کیتھولک عیسائیوں کے مذہبی پیشوا پوپ لیو پھیپھڑوں میں پائی جانے والی رسولی نکلوانے کے لیے منگل کو اسپتال میں داخل ہوں گے جہاں ان کی سرجری کی جائے گی۔ خبر رساں ادارے کے مطابق ویٹی کن نے بتایا کہ 71 سالہ پوپ لیو کے پھیپھڑوں میں معمول کے طبی معائنے کے دوران ایک چھوٹی رسولی کی نشاندہی ہوئی تھی جسے ابتدائی مرحلے میں دریافت کرلیا گیا۔ پوپ نے اتوار کو بتایا تھا کہ رسولی محدود حصے تک ہے۔ ویٹی کن کے مطابق پوپ لیو منگل کی صبح کے آخری حصے میں اسپتال منتقل ہوں گے تاہم سرجری کے وقت کا اعلان نہیں کیا گیا۔ ان کی تمام عوامی تقریبات 20 اکتوبر تک منسوخ کردی گئی ہیں۔ اسپتال میں داخلے سے قبل پوپ لیو نے پیر کی صبح اپنے معمول کے شیڈول کے مطابق سات ملاقاتیں کیں جن میں ارجنٹینا، نکاراگوا اور امریکا سے آئے بشپ بھی شامل تھے۔ روم میں ایک فلاحی ادارے کے ارکان سے ملاقات کے دوران انہوں نے واضح آواز میں گفتگو کی اور ان کی خدمات کو سراہا۔ ویٹی کن نے سرجری کے نتائج یا صحت یابی کے دورانیے سے متعلق مزید تفصیلات جاری نہیں کیں۔